Һәр якның, һәр төбәкнең матур кешеләре бар. Төскә-биткә генә түгел, үзләренең күркәм эшләре, тоткан кыйблалары белән киләчәк буыннарга үзләреннән тирән эз калдыручы шәхесләр алар. Безнең Түбән Көек төп мәктәбенең, авылыбызның шундый мәртәбәле шәхесләреннән берсе – Нигъмәтҗанов Габдуллаҗан Сәлихҗан улы белән 11 нче октябрь көнне очрашу уздырылды. Бу очрашуда ул үзенең тормыш юлы, укытучы һөнәрен сайлавы турында сөйләде. Фенологик күзәтүләр алып баруы, туган як тарихын өйрәнүе, хәбәрче буларак та мәкаләләр язуын искәртте. Бу очрашуда аның тирә-якка даны таралган дендрариесында үскән 60лап агач һәм куакның төрләреннән ясалган гербариеннан күргәзмә оештырылды.

Татар халкында ата-баба нәселен, җиде буынны белү изге бурыч булуын истә тотып, Югары Көек авылының шәҗәрәләрен туплау эше белән шөгыльләнүен аерым атап үтте. Бүгенге көндә аның бу хезмәте 5 китап итеп бастырылып дөнья күргән. Очрашу барышында Габдуллаҗан абый укучыларның һәрберсенең нәсел шәҗәрәләренең үзәк тармагын ясап бүләк итте. Кичә җыр-биюләр белән аралаштырылып барылды, соңыннан укучылар үзләре кызыксынган сорауларга да җавап алдылар. Һәрбер кешегә дә файдалы булган бу кичә күтәренке рухта тәмамланды. 

Габдуллаҗан абый белән очрашуга кагылышлы башка фотолар...