2017 нче елның 28 нче гыйнварында Түбән Көек төп гомуми белем мәктәбендә 8 нче сыйныф укучылары (сыйныф җитәкчесе Мөбәрәкшина Лилия Радик кызы) тарафыннан «Бер күрешү − бер гомер» дигән исем астында студентлар белән очрашу кичәсе үткәрелде. Очрашуга мәктәпне төрле елларда тәмамлаган студентлар Василова Эльвира (2013 нче елгы чыгарылыш), Кадимова Надия (2015), Нуриев Альберт (2016), Садриев Ислам (2015), Шакирова Карина (2015), Хафизова Әминә (2015) килде. Алар кызыклы итеп укулары, сайлаган һөнәрләре, яңа коллективта очраган авырлыклар һәм аларны җиңү юллары турында сөйләделәр. Укучылар үзләре өчен файдалы бик күп мәгълүмат алдылар. Очрашуда катнашучылар 2015 нче елда фаҗигале рәвештә һәлак булган КФУ студенты Габдуллаҗанова Гөлия Илдус кызын (2014 нче елгы чыгарылыш) бер минут тынлык белән искә алдылар.

2017 нче елның 1 нче февралендә Түбән Көек төп гомуми белем мәктәбендә «Балачак фәлсәфәсе» дип исемләнгән әдәби кичә оештырылды. Ул язучы, шагыйрь, драматург һәм әдәбият белгече, Татарстан Язучылар берлегенең Абдулла Алиш премиясе лауреаты (2002), Татарстанның атказанган сәнгать эшлеклесе (2003) Галимҗан Хәмитҗан улы Гыйльмановның 60 яшьлек юбилее хөрмәтенә багышланды. Кичәдә язучының шаян шигырьләре сөйләнде, аның сүзләренә язылган җырлар тыңланды, хикәяләре сәхнәләштерелде (оештыручы 2 нче сыйныф җитәкчесе Шакирова Венера Илгизәр кызы).