...Ә аналар, нечкә күңеллеләр, Көн дә хатлар көтә улыннан. Хәер-догаларын укып көтә, Күзен алмый киткән юлыннан. Аналарның хәер-фатыйхасы Юлдаш булсын солдат улларга. Көч вә кодрәт бирсен, куәт бирсен Иминлеген илнең сакларга! 23 нче февраль – Ватанны саклаучылар көнендә Түбән Көек төп гомуми белем мәктәбендә «Туган якка солдат сәламе» дип исемләнгән солдат аналары белән очрашу кичәсе уздырылды. Кичәбезнең кадерле кунаклары итеп бүгенге көндә Ватанны саклаучы егетләребезне дөньяга тудырган һәм тәрбияләп үстергән әниләр – Солдат Аналары чакырылды.

Россия армиясе – дөньядагы иң зур армия. Анда миллионнан артык солдат хезмәт итә. Шул солдатлар арасында безнең якын-тирә авыллардан да 4 егетебез бар. Менә алар: Шиһапов Айназ, Сәхибуллин Рифат, Галимуллин Рәмис һәм Лотфуллин Альфредлар. Ә менә Гайнуллин Айназ белән Мөхетдинов Инсаф яңа гына исән-сау, ныгып, армия сафларында хезмәт итеп кайттылар.

Аналар бөтен йөрәк җылыларын биреп үстергән балалар, үсеп буйга җитү белән, очар кошлар кебек, тирә-якка таралалар. Нишлисең бит, ананың бөеклеге дә әнә шунда – ул илебезнең, һәр почмагында намус белән хезмәт итә алырлык, белемле, тырыш, сәләтле, илһамлы балаларын үстереп Ватаныбыз кулына тапшыра. Аннан соң?! Аннан соң, сабыр гына кош теледәй генә булса да бер хат көтә, изге хәбәр көтә ана. Кадерле әниләрнең йөрәк түренә күпме җылылык, наз, яхшылык сыйган! Кичәбездә шушы аналарга мәдхия җырланды. Кичәне 9 нчы сыйныф җитәкчесе Фәтхрахманова Эльвера Мансур кызы алып барды. Җыр, биюләр белән үрелеп барган кичә укучыларга патриотик тәрбия бирүнең бер үрнәге булды.