2015 нче елның 8 нче октябрендә Казанда ТР Мәгарифне үстерү институтында «Авыл укытучысы – 2015» бәйгесенең III этабына чыккан педагоглар үз предметлары буенча мастер-класс тәкъдим иттеләр. Әтнә районы Түбән Көек урта мәктәбенең тарих һәм җәмгыять белеме укытучысы Хәбибуллин Рамил Шамил улы югары нәтиҗә күрсәтте һәм «Мәгариф» журналының Рәхмәт хаты белән бүләкләнде.

«Авыл укытучысы» – «Сельский учитель» – 2015 бәйгесендә югары нәтиҗә күрсәткән Әтнә районы Түбән Көек урта мәктәбенең тарих һәм җәмгыять белеме укытучысы Хәбибуллин Рамил Шамил улына «Мәгариф» журналының Рәхмәт хаты тапшырылды.

2015 нче елның 1 нче октябрендә Түбән Көек урта гомуми белем мәктәбендә Өлкәннәр көне үткәрелде. Бәйрәм тантанасына барлык укучыларның әби-бабайлары, дәү әниләре чакырылды. Концерт номерлары беткәннән соң, бәйрәм чәй табыны артында дәвам итте.

2015 нче елның 27 нче сентябрендә милли кросс үтте. «Түбән Көек урта гомуми белем мәктәбе» муниципаль бюджет гомуми белем учреждениесе укучысы Әхмәдуллина кызлар арасында III урын, ә Гәрәев егетләр арасында II урын алды.

Район мәгариф хезмәткәрләренең җәйге Спартакиадасы район турында катнашып, Түбән Көек урта гомуми белем мәктәбе укытучылары җиңүләргә иреште. Бадминтон буенча I урында Абдуллина Гөлназ, III урында Галиәхмәтов Дамир, канат тартуда I урында Галиәхмәтов Дамир һәм Зарипова Рүзия, кул көрәшендә III урында Зарипова Рүзия булды.  

Бәхилләшү сүзе

Көз аена туры килде
Гөлия, синең китүең.
Сентябрьнең 14ендә
Туктап калды йөрәгең.

Синең яшьлегең үзе бер матур дөнья иде. Япь-яшь килеш тормыштан ямь табып, аны колачлап сөеп, олыларча зирәк караш белән яши башлаган идең. 14 нче сентябрь иртәсе туганнарыңа, авылдашларга, сине белгән һәр кешегә кара кайгы алып килде. Торналар да синең кайгыңны уртаклашты. Туктаусыз яуган яңгыр да, кара болытлар да таралды ул көнне, чөнки җир-анабыз сине үзең кебек елмаеп торган кояш, йомшак җиле белән каршылады. Син – оҗмах баласы.
Тирә-юньдәгеләрнең өметен аклап, кечкенәдән зирәк булдың, уен-көлке яраттың. Көләч йөз, тәмле сүз белән һәр кешенең күңеленә юл таптың. Әти-әниеңә игътибарлы, өлкәннәргә итәгатьле, олысына-кечесенә ярдәмчел булдың. Гаиләдә бердәнбер бала булсаң да син  әниеңә  игелекле бала, әби-бабаңа таяныч, иптәшләреңә үрнәк дус, күршеләреңә хөрмәтле, безгә-укытучыларга – горурланырлык укучы идең.

2015 нче елның 10 нчы сентябрендә Түбән Көек урта гомуми белем мәктәбендә «Спортивный Татарстан» көне уңаеннан укулар иртәнге гимнастика белән башланып китте. Һәр укучы спорт киеменнән килгән иде. Сәламәтлек тәнәфесләрендә музыка астында төрле физик күнегүләр, бию алымнары ясалды. Мәктәп буенча «Көзге кросс - 2015» үткәрелде.

2015 нче елның 9 нчы сентябрендә Түбән Көек урта гомуми белем мәктәбенең башлангыч сыйныф укучылары укытучылары белән берлектә «Мәрхәмәтле Татарстан» («Добрый Татарстан») акциясе кысаларында «Йолдызчык» балалар бакчасында концерт куйдылар.

2015 нче елның 7 нче сентябрендә Түбән Көек урта гомуми белем мәктәбендә ЮХИДИ инспекторы Муллагалиев Ф.И., ПДН инспекторы Хадиев Д.Х. һәм өлкән участок инспекторы Сабиров Ф.Ф. тарафыннан укучыларга «Юл йөрү кагыйдәләрен бел» темасына доклад укылды һәм хокук бозуларны булдырмау буенча чыгыш ясалды. Башлангыч сыйныф укучыларына таратма материаллар өләшенде.

Хөрмәтле укытучылар, әти-әниләр, балалар.

«Түбән Көек урта гомуми белем мәктәбе» муниципаль бюджет гомуми белем учреждениесе коллективы сезне Белем бәйрәме белән тәбрикли.

Сезгә сәламәтлек, тынычлык, иминлек, уңышлар, озын гомер теләп кала.