2015 нче елның 21 нче гыйнварында Түбән Көек урта гомуми белем бирү мәктәбенең 4 нче сыйныф укучылары мәктәп музеена сәяхәт иттеләр. Музейда Бөек Җиңүнең 70 еллыгына карата төзелгән почмак белән таныштылар. Хәтер китабыннан авылдашларының исемнәрен эзләделәр. Үзләре дә сугыш турында шигырьләр укыдылар.

Район мәктәпләре арасында үткәрелгән «Кар шәһәрчеге» конкурсында Түбән Көек урта гомуми белем бирү мәктәбе коллективы «Иң матур кар сыннары» номинациясендә җиңүче булды һәм грамота белән бүләкләнде.

2015 нче елның 6 нчы гыйнварында район балалар һәм яшүсмерләр спорт мәктәбе беренчелегенә уздырылган мини-футбол ярышында Түбән Көек урта гомуми белем бирү мәктәбенең кызлар командасы II урын алды.

2015 нче елның 4 нче гыйнварында Түбән Көек урта гомуми белем бирү мәктәбенең 6 нчы сыйныф укучылары Нуриев Айрат, Василов Илнур, Мөхетдинов Илфир һәм 7 нче сыйныф укучысы Шәяхмәтов Ильяр «Президент спорт уеннары» Бөтенроссия укучылар кышкы фестиваленең Региональ этабында катнаштылар.

2014 нче елның 29 нчы декабрендә авыр атлетика буенча 1998-2001 нче елгы яшьләр арасында район балалар һәм яшүсмерләр спорт мәктәбе беренчелегенә уздырылган ярышта Түбән Көек урта гомуми белем бирү мәктәбе укучылары зур уңышларга иреште. 44 килограммга кадәр авырлыкта Шакирова Дилә, 50 килограммга кадәр авырлыкта Гәрәев Илназ, 53 килограммга кадәр авырлыкта Мәрданова Лилия, 56 килограммга кадәр авырлыкта Нуриев Альберт, 60 килограммга кадәр авырлыкта Аскарова Диләрә, 94 килограммнан югары авырлыкта Фәтхрахманов Илмир 1 нче урыннарны, 48 килограммга кадәр авырлыкта Закирова Язилә, 56 килограммга кадәр авырлыкта Заһидуллин Илфир 2 нче урыннарны, 50 килограммга кадәр авырлыкта Аканашев Азат 3 нче урынны алдылар. 

2015 нче елның 6 нчы гыйнварында Түбән Көек урта гомуми белем бирү мәктәбенең «Йолдызчык» кышкы ял һәм сәламәтләндерү мәктәп яны лагерена йөрүчеләр районыбыз үзәгендә урнашкан боз шәһәрчегенә тау шуарга бардылар.

2015 нче елның 5 нче гыйнвары Түбән Көек урта гомуми белем бирү мәктәбенең «Йолдызчык» кышкы ял һәм сәламәтләндерү мәктәп яны лагеренда «Зарарлы гадәтләргә вакытыбыз юк» исеме астында үтте. Балаларның сәламәтлеген саклау максатыннан күңелле уеннар үткәрелде.

2015 нче елның 4 нче гыйнварында Комыргуҗа урта гомуми белем бирү мәктәбендә урнашкан музейга сәяхәткә бардык. Мәктәп ишеген ачып керүгә музей җитәкчесе Зилә апа безне якты йөз белән каршы алды. Ә инде музейга килгәндә, үзебезне ниндидер бер сихри дөньяга аяк баскан кебек хис иттек. Бүлмәдә якты, тыныч атмосфера хөкем сөрә. Әлеге музей безнең күренекле якташыбыз мәшһүр татар мәгърифәтчесе, фәлсәфәчесе, тарихчысы, дин әһеле, педагог, археолог, этнограф, көнчыгыш халыклар белгече Шиһабетдин Мәрҗани (Шиһабетдин бин Бәһәүтдин Мәрҗани) [16 нчы гыйнвар, 1818 нче ел — 15 нче апрель, 1889 нчы ел] истәлегенә багышланган. Укучыларыбыз аның тормышы, иҗат юлы хакында тирәнтен таныштылар. Бүгенге көн укучыларыбыз өчен истәлекле көн булып калыр дип ышанып каласыбыз килә.

2015 нче елның 3 нче гыйнварында Түбән Көек урта гомуми белем бирү мәктәбенең кышкы лагеренда Җиңүнең 70 еллыгына багышлап «Күңелле стартлар» уены үткәрелде. Һәр укучы әлеге уенда бик теләп катнашты. Уеннар берсеннән-берсе күңелле, үзенчәлекле һәм мавыктыргыч булды. Укучылар арасында әлеге темага багышланган рәсем конкурсы үткәрелде. Бүгенге көн укучыларыбыз өчен аеруча да күңелле узды.

2014 нче елның 29 нчы декабрендә Татарстан АССР, РСФСРның атказанган сәнгать эшлеклесе (1957, 1959), ТАССРның Г. Тукай исемендәге Дәүләт бүләге лауреаты (1968), ТАССРның халык язучысы (1986) Нәкый Исәнбәтнең (Нәкый Сираҗетдин улы Закиров) [29 нчы декабрь, 1899 нчы ел (яңа стиль белән 10 нчы гыйнвар, 1900 нчы ел) — 15 нче сентябрь, 1992 нче ел] тууына 115 ел тулуга багышлап, Түбән Көек урта гомуми белем бирү мәктәбенең башлангыч сыйныф укучылары белән әдәби кичә үткәрелде. Кичәне китапханәче Шәрәфиева Гөлфия һәм 4 нче сыйныфлар укытучысы Шакирова Венера оештырды. 4 нче сыйныф укучылары Нәкый Исәнбәтнең шигырьләрен сәхнәләштерде.

Хөрмәтле сайтыбыз кунаклары!

Түбән Көек урта гомуми белем бирү мәктәбе коллективы сезне якынлашып килүче Яңа ел бәйрәме белән тәбрикли. Сезгә иминлек һәм бәхет белән тулы көннәр, эшегездә һәм тормышыгызда зурдан-зур уңышлар теләп кала.

Яңа 2015 нче ел барыгызга да бетмәс-төкәнмәс шатлыклар, яңалыклар алып килсен! Юлларыгыз һәрвакыт уң, уй-хыялларыгыз якты, сәламәтлегегез корычтай нык булсын! Яңа ел кичендә теләгән барлык теләкләрегез кабул булсын!