2017 нче елның 11 нче мартында Түбән Көек төп гомуми белем мәктәбендә тарих атналыгы кысаларында тарих һәм җәмгыять белеме укытучысы Хәбибуллин Рамил Шамил улы 5-9 нчы сыйныф укучылары өчен «Нәрсә? Кайда? Кайчан?» дигән уен уздырды. Тарих атналыгына нәтиҗә ясалды.

2017 нче елның 1 нче мартыннан 6 нчы мартына кадәр Зарипова Чулпан Әмир кызы тарафыннан инглиз теле атналыгы уздырылды. Укучылар төрле уеннарда үз белемнәрен сынадылар. 4-5 нче сыйныф укучылары арасында лингвистик уен, 2-3 нче сыйныфларда КВН, 7-8 нче сыйныфларда викторина үтте. Инглиз телендә күрсәтелгән мультфильмны укучылар яратып карадылар. Рәсем, стенгазета конкурсларында, ребус, кроссворд чишүдә укучылар актив булдылар. Шулай ук, атналык кысаларында, укучылар олимпиадада катнаштылар. 

Түбән Көек төп гомуми белем мәктәбенең тарих һәм җәмгыять белеме укытучысы Хәбибуллин Рамил Шамил улы 5-6 нчы сыйныф укучылары белән тарих фәненнән «Борынгы заман тарихы белгечләре», 5-9 нчы сыйныфлар белән «Үз уеным» дип исемләнгән чаралар уздырды. Атналык дәвам итә...

9 нчы март – Барби курчагының туган көне. Түбән Көек төп гомуми белем мәктәбендә дә, башлангыч сыйныф укучылары белән, бу көн билгеләп үтелде (оештыручы Шакирова Венера Илгизәр кызы). Кызлар үзләренең курчаклары белән мактаныштылар.

2017 нче елның 7 нче мартында 8 нче март – Халыкара хатын-кызлар көне уңаеннан Түбән Көек төп гомуми белем мәктәбенең 7 нче сыйныф егетләре мәктәбебез кызлары өчен уеннар оештырдылар. Шул ук вакытта укытучы апалар концерт карап ял иттеләр.

2017 нче елның 4 нче мартында Түбән Көек төп гомуми белем мәктәбендә тарих атналыгы кысаларында тарих һәм җәмгыять белеме укытучысы Хәбибуллин Рамил Шамил улы тарафыннан башлангыч сыйныф укучылырына мәктәп каршындагы Туган якны өйрәнү музеена экскурсия оештырылды.

Аш-су остасы, татар халкының традицион милли ризыкларын әзерләү рецептларын туплаучы, эшкәртүче һәм бастырып чыгаручы, Ленин һәм Халыклар Дуслыгы орденнары, СССР Халык хуҗалыгы казанышлары күргәзмәсенең алтын медале белән бүләкләнгән Юныс Әхмәтҗан улы Әхмәтҗанов хөрмәтенә 2017 нче ел «Татар милли ашлары елы» дип игълан ителде. 2017 нче елның 4 нче мартында Түбән Көек төп гомуми белем мәктәбенең технология укытучысы Зарипова Рүзия Сәлих кызы һәм китапханәче Әхмәдуллина Эльмира тарафыннан Юныс Әхмәтҗановның [28.02.1927 – 13.02.1984] тууына 90 ел тулуга багышлап чара уздырылды.

2017 нче елның 3 нче мартында Түбән Көек төп гомуми белем мәктәбенең 1 нче сыйныф укучылары әлифба китабы белән саубуллаштылар. Шул уңайдан укучылар сыйныф җитәкчесе Заһидуллина Розалия Әхәт кызы белән «Әлифба бәйрәме» уздырдылар. Бәйрәм бик матур һәм күңелле үтте.

3 нче март Бөтендөнья язучылар көне буларак билгеләп үтелә. Аны уздыру турындагы карар «International PEN Club»ның 48 нче конгрессында, 1986 нчы елда, кабул ителә. 1921 нче елда оешкан халыкара язучылар берлеге − ПЕН-клубның башлангычы Лондонга барып тоташа. «PEN» аббревиатурасы Poets, Essayists, Novelists сүзләреннән барлыкка килгән, инглиз теленнән тәрҗемә иткәндә, ул шагыйрьләр, очерк һәм роман язучылар дигәнне аңлата. Бу көн безнең мәктәбебездә дә билгеләп үтелде. 2 нче сыйныф укучылары белән «Язучылар − хөрмәткә лаек кешеләр» дигән темага түгәрәк өстәл оештырылды (оештыручы Шакирова Венера Илгизәр кызы). Укучылар язучылар белән таныштылар, яңа китаплар турында фикер алыштылар, шигырьләр сөйләделәр.